نو منتخب امریکی مسلم سینیٹر نے ایران کیخلاف جنگ کو غلط فیصلہ قرار دے دیا

نو منتخب امریکی مسلمان سینیٹر عبد الرحمان محمد السید نے امریکی پالیسی پر شدید تنقید کرتے ہوئے کہا ہے کہ ایران کے خلاف جنگ کا آغاز کرنا ایک بہت بڑا اور غلط فیصلہ تھا۔

امریکی ٹی وی کو دیے گئے اپنے ایک انٹرویو میں سینیٹر عبد الرحمان محمد السید نے کہا کہ امریکا ایک ایسی جنگ میں پھنس چکا ہے جو سرے سے شروع ہی نہیں ہونی چاہیے تھی، اور ماضی کے امریکی صدور نے ہمیشہ ایران کے ساتھ براہِ راست جنگ سے گریز کیا تھا۔ انہوں نے الزام عائد کیا کہ ایک غیر ملکی وزیراعظم امریکا کو ایران کے خلاف جنگ پر آمادہ کرنے کی مسلسل کوشش کرتا رہا، جبکہ عالمی اصولوں کے تحت اسرائیلی حکومت کے ساتھ بھی دیگر تمام ممالک کی طرح یکساں سلوک ہونا چاہیے۔

سینیٹر عبدالرحمان نے مزید کہا کہ امریکا کی جانب سے اسرائیل کو ملنے والی فوجی امداد اور فروخت کیا جانے والا جنگی سامان نسل کشی کے لیے استعمال ہو رہا ہے۔ ان کا کہنا تھا کہ انسانی حقوق کی خلاف ورزیوں پر مصر کی امریکی امداد بھی روکی جانی چاہیے، اور کسی بھی حکومت کی غلط پالیسیوں پر تنقید کرنے کو اس ملک یا قوم کے خلاف تعصب قرار دینا بالکل ناانصافی ہے۔