روسی وفد کی امریکی خاتونِ اول میلانیا ٹرمپ سے ملاقات خوش آئند ہے، کریملن

روس نے امریکی خاتونِ اول میلانیا ٹرمپ کے ساتھ واشنگٹن میں روسی اور یوکرینی وفود کی ملاقات کو مثبت پیش رفت قرار دیتے ہوئے انسانی ہمدردی کی بنیاد پر مشترکہ اقدامات جاری رکھنے کی خواہش کا اظہار کیا ہے۔

کریملن کے ترجمان دمتری پیسکوف نے صحافیوں سے گفتگو کرتے ہوئے کہا کہ ماسکو، امریکی صدر ڈونلڈ ٹرمپ کی اہلیہ میلانیا ٹرمپ کے ساتھ روسی وفد کی ملاقات کو مثبت انداز میں دیکھتا ہے۔ انہوں نے اس امر کو بھی خوش آئند قرار دیا کہ وائٹ ہاؤس میں ہونے والی اس اہم نشست میں یوکرینی نمائندوں نے بھی شرکت کی۔

ترجمان کریملن کا کہنا تھا کہ تنازع کے باوجود انسانی ہمدردی کے معاملات پر مثبت ماحول اور تعاون جاری رکھنے کی خواہش کا برقرار رہنا سب سے اہم بات ہے۔ انہوں نے 5 نومبر کو وائٹ ہاؤس میں ہونے والی اس ملاقات کے تناظر میں حال ہی میں خیرسون کے علاقے الیوشکی میں انجام دی گئی انسانی ہمدردی کی کارروائیوں کا حوالہ دیتے ہوئے مستقبل میں بھی ایسے مشترکہ اقدامات کی ضرورت اور اہمیت پر زور دیا۔