سپین کے جزائر کینری میں تارکینِ وطن کی آمد میں ریکارڈ اضافہ

اسپین کے جزائر کینری (Canary Islands) میں تارکینِ وطن کی آمد میں ریکارڈ اضافہ دیکھنے میں آیا ہے، جہاں ہزاروں افراد سمندری راستوں سے اپنی جانیں خطرے میں ڈال کر یورپ میں داخل ہونے کی کوششیں کر رہے ہیں۔

برطانوی میڈیا کے مطابق، جاری ماہِ نومبر کے ابتدائی 6 روز کے دوران سمندر میں کارروائیاں کرتے ہوئے 3 ہزار 261 تارکینِ وطن کو بحفاظت ریسکیو کر لیا گیا ہے۔ حال ہی میں اسپین کے ساحل کے قریب 2 غیر قانونی کشتیوں سے مزید 500 تارکینِ وطن کو بچایا گیا، جبکہ ایک کشتی سے ایک شخص کی لاش بھی برآمد ہوئی۔ کینری انتظامیہ کا کہنا ہے کہ گزشتہ چند ہفتوں میں ساحل کے قریب مختلف حادثات کے نتیجے میں 9 تارکینِ وطن لقمہ اجل بن چکے ہیں۔

جزائر کینری کے حکام نے صورتحال پر تشویش کا اظہار کرتے ہوئے خبردار کیا ہے کہ تارکینِ وطن کی موجودہ لہر کے باعث سال 2024ء کے تمام ریکارڈز ٹوٹنے کا شدید خدشہ پیدا ہو گیا ہے۔ مقامی حکام نے بحران کی شدت کو ناقابلِ برداشت قرار دیتے ہوئے مرکزی حکومت اور یورپی یونین سے تارکینِ وطن کی اس آمد کو روکنے اور ساحلی سیکیورٹی کے لیے فوری و سخت اقدامات اٹھانے کا مطالبہ کیا ہے۔