نیو یارک میں PACOLI کے زیرِ اہتمام قائداعظم ڈے کی پُرجوش تقریب، فنکاروں اور کمیونٹی شخصیات کو اعزازات

نیو یارک: پاکستانی امریکن کمیونٹی آرگنائزیشن آف لانگ آئی لینڈ (PACOLI) کے زیرِ اہتمام نیو یارک میں بانیٔ پاکستان قائداعظم محمد علی جناح کے یومِ پیدائش کی مناسبت سے پُرجوش اور یادگار تقریب منعقد کی گئی۔ تقریب معروف شيرازی ریسٹورنٹ میں ہوئی، جسے قومی پرچم اور قائداعظم کی بڑی تصاویر سے سجایا گیا تھا۔

تقریب میں PACOLI کے چیئرمین بشیر قمر نے قائداعظم محمد علی جناح جبکہ تنظیم کے صدر توقیر الحق نے لیاقت علی خان کی شخصیات کے انداز میں انہیں خراجِ عقیدت پیش کیا۔ خواتین نے روایتی لباس میں ملی نغمے پیش کیے اور پاکستان کی سلامتی، ترقی اور خوشحالی کے نعرے لگائے۔

تقریب کے دوران موسیقی کے پروگرام نے بھی حاضرین کو محظوظ کیا، جہاں معروف گلوکار جنید یونس اور بلال شافی پٹیل نے اپنی شاندار پرفارمنس سے تقریب کو چار چاند لگا دیے۔

تقریب کا اہم مرحلہ ایوارڈز کی تقسیم تھا، جس میں بچوں، نوجوانوں، خواتین اور پاکستانی امریکن کمیونٹی کی نمایاں شخصیات کو ان کی سماجی، فلاحی اور کمیونٹی خدمات کے اعتراف میں اعزازات سے نوازا گیا۔ نیویارک پولیس کے ڈپٹی انسپکٹر وحید اختر سمیت متعدد معروف شخصیات کو ایوارڈز دیے گئے۔

مقررین نے قائداعظم کے وژن، دو قومی نظریے، قیامِ پاکستان کی قربانیوں اور بیرونِ ملک مقیم پاکستانیوں کے اتحاد کی اہمیت پر زور دیا۔ مقررین کا کہنا تھا کہ پاکستان ایک عظیم نعمت ہے، جس کی تاریخ اور نظریہ نئی نسل تک منتقل کرنا ہم سب کی مشترکہ ذمہ داری ہے۔

تقریب میں تلاوتِ قرآن، خصوصی دعا، پاکستانی کھانوں اور سندھی ٹوپی و اجرک کے تحائف نے ماحول کو مزید یادگار بنا دیا۔ تقریب اتحاد، حب الوطنی اور امید کے پیغام کے ساتھ اختتام پذیر ہوئی۔