نیو یارک پولیس ہیڈکوارٹر میں رمضان کے آغاز پر کریسنٹ مون لائٹنگ تقریب منعقد

نیو یارک پولیس ڈیپارٹمنٹ کے ہیڈکوارٹر ون پولیس پلازہ میں رمضان المبارک کے آغاز پر دوسری سالانہ “کریسنٹ مون لائٹنگ” تقریب منعقد کی گئی، جس میں مسلم پولیس افسران اور اعلیٰ حکام نے بڑی تعداد میں شرکت کی۔

یہ روایت گزشتہ برس مسلم آفیسرز سوسائٹی کی جانب سے شروع کی گئی تھی، جس کا مقصد رمضان کی روحانی اہمیت کو اجاگر کرنا اور محکمے کے اندر مذہبی ہم آہنگی کو فروغ دینا ہے۔

تقریب کے دوران چاند کی علامتی روشنی روشن کی گئی، جس کے بعد افطار کا اہتمام بھی کیا گیا۔ شرکا کا کہنا تھا کہ یہ اقدام نیو یارک پولیس میں رواداری اور باہمی احترام کی عکاسی کرتا ہے۔

ذرائع کے مطابق نیو یارک پولیس ڈیپارٹمنٹ میں دو ہزار سے زائد مسلم افسران خدمات انجام دے رہے ہیں، جن میں نمایاں تعداد پاکستانی نژاد افسران کی بھی ہے۔ تقریب میں پاکستانی کمیونٹی کے افراد نے بھی شرکت کی۔

منتظمین کا کہنا تھا کہ اس روایت کو آئندہ برسوں میں مزید وسعت دی جائے گی تاکہ مختلف مذاہب اور ثقافتوں کے درمیان ہم آہنگی کو مزید مضبوط کیا جا سکے۔