ظلم کی رات ختم ہوگی، عدل کا سورج طلوع ہوگا، ملک کو بچانا ہم سب کی ذمہ داری ہے: اعظم سواتی

سابق وفاقی وزیر اعظم سواتی نے انسداد دہشت گردی عدالت راولپنڈی کے باہر میڈیا سے گفتگو کرتے ہوئے کہا ہے کہ ملک میں اس وقت ظلم کی رات ہے، مگر انہیں یقین ہے کہ یہ رات ختم ہوگی اور عدل کا سورج طلوع ہوگا۔

اعظم سواتی کا کہنا تھا کہ پاکستان کو آگے بڑھنا چاہیے اور ہر فرد کو کوشش کرنی چاہیے کہ ملک محفوظ رہے۔ انہوں نے کہا، “میں ذاتی مفاد کے بجائے ملک کو بچانے کی کوشش میں ہوں”۔سابق وفاقی وزیر نے انکشاف کیا کہ بانی پی ٹی آئی نے بات چیت کی ذمہ داری انہیں سونپی تھی۔ ان کا کہنا تھا کہ انہیں نئی قیادت پر بھروسہ ہے اور امید ہے کہ ہم سب کے مزاج بدلیں گے اور حالات کو سمجھ کر فیصلے کیے جائیں گے۔اعظم سواتی نے کہا کہ موجودہ حالات میں ملک اور اداروں کو بچانے کی سنجیدہ کوشش ہونی چاہیے، تاہم نئی قیادت سے ان کی براہِ راست رسائی نہیں ہے۔ انہوں نے بتایا کہ دو اپریل 2025 کو آخری بار بانی پی ٹی آئی سے ملاقات ہوئی تھی۔انہوں نے کہا کہ انہوں نے بانی پی ٹی آئی کو پہلے ہی بتا دیا تھا کہ “یہ لوگ مجھے نہیں چھوڑیں گے”، اور یہ بھی کہا تھا کہ اپنی جماعت کے کچھ لوگ بھی ساتھ نہیں دیں گے۔اعظم سواتی کا کہنا تھا کہ جو لوگ پیغامات لے کر آ رہے ہیں، اب فیصلہ انہی کے ہاتھ میں ہے کہ ملک کو کس سمت لے جانا ہے۔ انہوں نے اعلان کیا کہ وہ سینیٹ میں بھی تقریر کریں گے اور اپنا ذاتی لائحہ عمل قوم کے سامنے رکھیں گے۔