نیلم جہلم منصوبہ، نیسپاک کی ناقص نگرانی سے قومی خزانے کو اربوں روپے کا نقصان

نیلم جہلم ہائیڈرو پاور منصوبے میں نیسپاک کی جانب سے کنسلٹنسی اور نگرانی کے فرائض میں سنگین خامیوں کے باعث قومی خزانے کو بھاری مالی نقصان پہنچنے کا انکشاف ہوا ہے۔

آڈٹ رپورٹ کے مطابق منصوبے کی مختلف تکنیکی غلطیوں اور ناقص نگرانی کے نتیجے میں مجموعی طور پر قومی خزانے کو 42 ارب 93 کروڑ روپے سے زائد کا نقصان ہوا۔

یہ انکشاف سید نوید قمر کی زیر صدارت پارلیمنٹ کی پبلک اکاؤنٹس کمیٹی کے اجلاس میں پیش کیا گیا، جہاں آڈیٹر جنرل حکام نے تفصیلی بریفنگ دی۔

رپورٹ میں بتایا گیا کہ نیسپاک جوائنٹ وینچر کی صورت میں منصوبے کے ڈیزائن سے لے کر تعمیراتی نگرانی تک ہر مرحلے میں شامل رہی، تاہم منصوبے میں مؤثر نگرانی نہ ہونے کے باعث سنگین تکنیکی خامیاں پیدا ہوئیں۔

آڈٹ حکام کے مطابق نیلم جہلم پاور پلانٹ کی سرنگ زمین کھسکنے کے باعث جولائی 2022 میں بند ہوئی، جبکہ مئی 2024 میں دوبارہ اسی سرنگ میں حادثہ پیش آیا جس سے منصوبے کی بحالی مزید متاثر ہوئی۔

منصوبے کی بندش کے دوران بجلی کی پیداوار نہ ہونے سے بھی اربوں روپے کا اضافی نقصان ہوا۔

وفاقی حکومت کی جانب سے اس معاملے کی انکوائری جاری ہے، جس کی سربراہی سابق سیکرٹری داخلہ شاہد علی کر رہے ہیں۔

پبلک اکاؤنٹس کمیٹی کے اجلاس میں رکن کمیٹی نے سوال اٹھایا کہ نیسپاک کے ہر معاملے کی انکوائری تو شروع ہوتی ہے مگر مکمل کیوں نہیں ہوتی۔

کمیٹی نے حتمی انکوائری رپورٹ آنے تک معاملہ مؤخر کر دیا۔