مریخ پر زندگی کا اشارہ؟ ناسا روور کی بڑی دریافت سامنے آگئی

واشنگٹن: امریکی خلائی ادارے ‘ناسا’ کے پرزیورینس روور نے مریخ کی چٹانوں میں انتہائی پیچیدہ کاربن مالیکیولز دریافت کیے ہیں، جس کے بعد سرخ سیارے پر قدیم خردبینی زندگی کے ممکنہ نشانات کی موجودگی پر سائنسی بحث تیز ہو گئی ہے۔ روور پر نصب جدید ‘شرلوک’ (SHERLOC) آلے کے ذریعے حاصل کردہ پیمائشوں سے مریخ کے ‘برائٹ اینجل آؤٹ کراپ’ نامی مقام کی پتھریلی چٹانوں میں نامیاتی کاربن کی موجودگی کی تصدیق ہوئی ہے۔ یہ مقام ‘نیریٹوا ویلِس’ کے قریب واقع ہے، جو ایک خشک ہو چکا قدیم دریا ہے اور اربوں سال قبل پانی کو مریخ کے مشہور ‘جیزیرو کریٹر’ (Jezero Crater) تک لے جاتا تھا۔ دریافت ہونے والے کاربن کی یہ شکل ‘میکرو مالیکیولر کاربن’ (MMC) کہلاتی ہے جو زمین پر عام طور پر زندہ جانداروں سے جنم لیتی ہے، تاہم ماہرینِ فلکیات کا کہنا ہے کہ یہ مادہ غیر حیاتیاتی یعنی جغرافیائی عمل کے نتیجے میں بھی بن سکتا ہے، اس لیے اسے مریخ پر ماضی کی زندگی کا حتمی ثبوت قرار نہیں دیا جا سکتا اور مزید تحقیق جاری ہے۔