یورپ میں شدید گرمی کی لپیٹ میں ، سپین میں 4 روز میں 212 ہلاکتوں

لندن/میڈرڈ: یورپ کے مختلف ممالک اس وقت شدید اور غیر معمولی گرمی کی لہر (ہیٹ ویو) کی زد میں ہیں، جس نے معمولاتِ زندگی کو مفلوج کرنے کے ساتھ ساتھ بڑے پیمانے پر جانی نقصان پہنچایا ہے۔ اسپین میں گرمی کی حالیہ لہر کے باعث محض 4 دنوں کے اندر ہلاکتوں کی تعداد 200 سے تجاوز کر گئی ہے، جہاں کئی علاقوں میں درجہ حرارت 42 ڈگری سینٹی گریڈ کو چھو گیا ہے۔ فرانس میں بھی صورتحال انتہائی تشویشناک ہے، جہاں 80 سال میں پہلی بار درجہ حرارت 44 ڈگری سینٹی گریڈ سے اوپر چلا گیا ہے اور اب تک 50 افراد لقمہ اجل بن چکے ہیں، جبکہ اٹلی میں بھی گزشتہ 24 گھنٹوں کے دوران گرمی کی شدت کے باعث 5 ہلاکتیں رپورٹ ہوئی ہیں۔

دوسری جانب، برطانیہ میں محکمہ موسمیات نے لندن اور ساؤتھ ایسٹ انگلینڈ کے لیے شدید گرمی کی ‘ریڈ وارننگ’ میں توسیع کر دی ہے۔ ماہرینِ موسمیات کے مطابق لندن میں درجہ حرارت 30 سے 40 ڈگری سینٹی گریڈ کے درمیان رہنے کا امکان ہے۔ اس شدید ترین گرمی کے باعث یورپی ممالک کے اسپتالوں پر مریضوں کا دباؤ بے پناہ بڑھ گیا ہے؛ رائل کالج آف فزیشنز نے تشویش کا اظہار کرتے ہوئے بتایا ہے کہ غیر معمولی حدت نہ صرف انسانی صحت کو متاثر کر رہی ہے بلکہ اسپتالوں کی حساس مشینوں اور طبی آلات کو بھی ناکارہ بنا رہی ہے، جس سے امدادی کاموں میں شدید مشکلات کا سامنا ہے۔