ایران نے منجمد اثاثوں سے امریکی مصنوعات خریدنے کا دعویٰ مسترد کر دیا

تہران: ایرانی پارلیمنٹ کے اسپیکر باقر قالیباف نے امریکی صدر ڈونلڈ ٹرمپ کے اس دعوے کو یکسر مسترد کر دیا ہے جس میں کہا گیا تھا کہ ایران اپنے منجمد اثاثوں کی بحالی کی صورت میں رقم امریکی زرعی مصنوعات خریدنے پر صرف کرے گا۔ سوشل میڈیا پلیٹ فارم ’ایکس‘ پر اپنے ایک بیان میں باقر قالیباف نے امریکی موقف پر سخت طنز کرتے ہوئے کہا کہ “امریکہ جھوٹا دعویٰ کر رہا ہے، ہم نے اب تک امریکہ کی جو واحد فصل دیکھی ہے وہ ‘بے اعتمادی’ ہے جو خالص اور گھریلو ہے”۔ انہوں نے مزید کہا کہ امریکی دعوؤں سے ثابت ہوتا ہے کہ واشنگٹن صرف جینیاتی طور پر تبدیل شدہ سویا بین، ٹوٹے ہوئے وعدے اور فضول باتیں ہی ایکسپورٹ کرنا جانتا ہے۔

ایرانی اسپیکر کا یہ کرارا جواب امریکی صدر ڈونلڈ ٹرمپ کے اس بیان کے بعد سامنے آیا ہے جس میں انہوں نے دعویٰ کیا تھا کہ پاک-امریکہ-ایران یا دیگر سفارتی رابطوں کے نتیجے میں ہونے والے ممکنہ معاہدے کے تحت ایران کے 12 ارب ڈالر کے منجمد اثاثے بحال تو کیے جائیں گے، لیکن انہیں قطر کی نگرانی میں ایک مخصوص اکاؤنٹ میں رکھا جائے گا۔ صدر ٹرمپ، نائب صدر جے ڈی وینس اور وزیرِ خزانہ اسکاٹ بیسنٹ کا مؤقف تھا کہ ایران اس رقم کو صرف امریکی کسانوں سے مکئی، سویا بین، گندم اور ادویات خریدنے کے لیے استعمال کرنے کا پابند ہوگا تاکہ امریکی مارکیٹ کو فائدہ پہنچے، تاہم تہران نے اس شرط کو واضح طور پر مسترد کر کے امریکی دعووں کی ہوا نکال دی ہے۔