’مجھے تنقید سے فرق نہیں پڑتا‘، نادیہ خان کا ناقدین کو دوٹوک جواب

معروف اداکارہ اور ٹی وی ہوسٹ نادیہ خان نے ناقدین کو کرارا جواب دیتے ہوئے واضح کیا ہے کہ اب انہیں سوشل میڈیا پر ہونے والی تنقید سے کوئی فرق نہیں پڑتا۔ ٹی وی پروگرام ’کیا ڈراما ہے‘ میں گفتگو کرتے ہوئے انہوں نے کہا کہ ماضی میں وائرل ہونا انہیں پریشان کرتا تھا لیکن اب لوگ جو چاہیں کہیں، انہیں کوئی پرواہ نہیں ہے۔ اسی پروگرام کے دوران نادیہ خان نے نئے مقبول ڈرامے ’زنجیریں‘ پر اپنی تنقید کا سلسلہ جاری رکھتے ہوئے کہا کہ اس ڈرامے کی کہانی میں کئی خامیاں موجود ہیں؛ مرکزی کردار ’سربلند‘ کا ’بانو‘ کو تلاش نہ کرنا اور دیگر اہم کرداروں سے لاتعلق رہنا کہانی کو بالکل غیر منطقی بنا دیتا ہے۔ انہوں نے مزید کہا کہ ایک اہم جذباتی منظر میں اداکارہ سجل علی نے تو بہترین اداکاری کی، لیکن سربلند کا کردار نبھانے والے اداکار کے تاثرات (Expressions) انتہائی کمزور رہے جس کی وجہ سے وہ پورا سین اپنا اثر کھو بیٹھا۔ واضح رہے کہ چند روز قبل اسی ڈرامے پر تبصرہ کرنے کے بعد نادیہ خان سوشل میڈیا پر وائرل ہو گئی تھیں اور لالی ووڈ کی متعدد مشہور شخصیات نے ان کے اس سخت ریویو پر انہیں آڑے ہاتھوں لیا تھا۔