والد کی خدمت نے مجھے بے شمار نعمتوں اور کامیابیوں سے نوازا: نادیہ خان

پاکستان شوبز انڈسٹری کی معروف اداکارہ اور میزبان نادیہ خان نے والدین کی خدمت کی اہمیت پر زور دیتے ہوئے کہا ہے کہ زندگی میں انہیں جو بھی نعمتیں، برکتیں اور کامیابیاں ملیں، وہ سب والد کی خدمت اور ان کی خواہشات کا خیال رکھنے کا نتیجہ ہیں۔ ایک نجی ٹی وی کے مارننگ شو میں گفتگو کرتے ہوئے نادیہ خان نے بتایا کہ ان کے والد ریٹائرمنٹ کے بعد مری میں رہنا چاہتے تھے لیکن بچوں کی شادیوں کے اخراجات کی وجہ سے وہ اپنا یہ خواب پورا نہ کر سکے۔ اداکارہ کے مطابق، جب ان کے والد نے دبئی سے واپسی پر رمضان مری میں گزارنے کی خواہش کی تو وہاں ہوٹلوں کی مہنگی قیمتوں اور صفائی کی ناقص صورتحال دیکھ کر انہوں نے والد کے لیے بھوربن میں ایک مستقل رہائش خریدنے کا فیصلہ کیا، جس کا نام انہوں نے “ابا کاٹیج” رکھا۔ نادیہ خان نے مزید کہا کہ وہ والد کے سفر کے دوران ہمیشہ ان کی اکانومی کلاس کی ٹکٹ کو اپنے خرچے پر بزنس کلاس میں اپ گریڈ کراتی ہیں اور ان کا ماننا ہے کہ اولاد کو ہمیشہ اپنے والدین کی ان خوشیوں کا خیال رکھنا چاہیے جو انہوں نے بچوں کی خاطر قربان کر دی ہوتی ہیں۔