آزاد کشمیر میں الٹرا فارم 47 والا انتخاب نظر آرہا ہے: ندیم افضل چن

پاکستان پیپلز پارٹی کے سینئر رہنما ندیم افضل چن نے ایک پریس کانفرنس سے خطاب کرتے ہوئے آزاد کشمیر کے انتخابات میں شدید بے ضابطگیوں کا الزام عائد کیا ہے۔ انہوں نے انکشاف کیا کہ پارٹی کی جانب سے 15 سے زائد تحریری درخواستیں دائر کی جا چکی ہیں، تاہم متعدد حلقوں میں آدھا وقت گزرنے کے باوجود پولنگ اسٹاف اور سامان پہنچ ہی نہیں سکا۔ ان کا کہنا تھا کہ ایک مخصوص سیاسی جماعت کو اقتدار میں لانے کے لیے پیپلز پارٹی کے پولنگ ایجنٹوں کو پولنگ بوتھس سے باہر نکالا جا رہا ہے اور ان کی شکایات پر ن لیگ کی جانب سے بھی کوئی جواب نہیں آیا، جبکہ آزاد کشمیر الیکشن کمیشن کا کردار مکمل طور پر مشکوک ہو چکا ہے۔

ندیم افضل چن نے مزید کہا کہ پیپلز پارٹی کی مضبوط پوزیشن کے پیش نظر جان بوجھ کر مسائل پیدا کیے جا رہے ہیں اور یہ پورا انتخابی عمل “الٹرا فارم 47” جیسا معلوم ہو رہا ہے۔ انہوں نے بتایا کہ پارٹی میں انتخابات کے بائیکاٹ کی مضبوط رائے موجود تھی مگر قیادت نے جمہوریت کی خاطر اسے مسترد کیا، تاہم اگر شکایات کا ازالہ نہ کیا گیا تو ان نتائج کو شفاف ماننا اور ان کی توثیق کرنا ناممکن ہو جائے گا۔ دورانِ پریس کانفرنس رہنما لطیف اکبر پر حملے کی اطلاع پر تشویش کا اظہار کرتے ہوئے انہوں نے متنبہ کیا کہ آزاد کشمیر انتخابات پر عالمی برادری کی نظریں ہیں، اس لیے انتظامیہ ہوش کے ناخن لے اور انتخابی عمل کی شفافیت کو فوری بحال کرے۔