مرونل ٹھاکر نے یشسوی جیسوال سے دوستی کی خبروں پر خاموشی توڑ دی

بھارتی ڈراما اور فلم انڈسٹری کی معروف اداکارہ مرونل ٹھاکر نے بھارتی کرکٹ ٹیم کے نوجوان بیٹر یشسوی جیسوال کے ساتھ اپنے لنک اپ اور ڈیٹنگ سے متعلق پھیلنے والی خبروں کی سخت الفاظ میں تردید کر دی ہے۔ سوشل میڈیا پر ایک وائرل کلپ پر تبصرہ کرتے ہوئے 34 سالہ اداکارہ نے افواہوں کو یکسر مسترد کیا اور لکھا کہ لوگ بغیر کسی تصدیق کے اس نوعیت کی من گھڑت خبروں پر یقین کیسے کر لیتے ہیں؟

مرونل ٹھاکر نے ویڈیو کے کمنٹ سیکشن میں سخت ردِعمل دیتے ہوئے لکھا: “بھائی، ریلیکس کریں! مجھے دکھائیں کہ ہم ایک ساتھ کہاں ہیں؟ آپ جیسے پڑھے لکھے لوگ ایسی افواہوں کو سچ کیسے مان سکتے ہیں؟” انہوں نے مزید کہا کہ “ملک میں اور بھی کئی اہم مسائل موجود ہیں، لہٰذا ’جن زی‘ (Gen Z) سے کچھ سیکھیں اور درست و حقیقی موضوعات پر ویڈیوز بنائیں تاکہ آپ کو زیادہ ویوز مل سکیں”۔ واضح رہے کہ یہ افواہیں اس وقت شروع ہوئی تھیں جب دونوں شخصیات کو ممبئی کے علاقے باندرہ ویسٹ میں ایک ہی کیفے سے الگ الگ باہر نکلتے دیکھا گیا تھا، جسے سوشل میڈیا صارفین نے جوڑ کر من گھڑت کہانیوں کی شکل دے دی۔