مونی رائے اور سوراج نمبیار نے علیحدگی کا اعلان کردیا

ممبئی: بالی ووڈ کی مقبول اداکارہ مونی رائے اور دبئی سے تعلق رکھنے والے بزنس مین سوراج نمبیار نے اپنی چار سالہ رفاقت ختم کرنے کا باضابطہ اعلان کر دیا ہے۔ دونوں شخصیات نے سوشل میڈیا پر ایک مشترکہ بیان جاری کرتے ہوئے تصدیق کی ہے کہ انہوں نے باہمی رضامندی سے اپنی راہیں جدا کرنے کا فیصلہ کر لیا ہے۔ مونی رائے اور سوراج نمبیار نے اپنے بیان میں واضح کیا کہ یہ فیصلہ انہوں نے اپنی ذاتی ترجیحات پر گہرائی سے غور کرنے کے بعد کیا ہے۔ انہوں نے مداحوں اور میڈیا سے درخواست کی ہے کہ اس مشکل گھڑی میں ان کی پرائیویسی کا احترام کیا جائے اور انہیں اس نجی معاملے کو خوش اسلوبی سے طے کرنے کا موقع دیا جائے۔ اداکارہ نے اپنے پیغام میں سوشل میڈیا پر گردش کرنے والی ’جھوٹی کہانیوں اور من گھڑت بیانیوں‘ کی سختی سے تردید کی اور اپیل کی کہ حقیقت کے برعکس خبریں پھیلانے سے گریز کیا جائے۔ بیان میں مزید کہا گیا کہ علیحدگی کے باوجود دونوں مستقبل میں اپنی دوستی کے رشتے کو قائم رکھنے کی کوشش کریں گے اور ایک دوسرے کے لیے احترام کا جذبہ برقرار رکھیں گے۔

یاد رہے کہ مونی رائے اور سوراج نمبیار جنوری 2022 میں ایک پروقار تقریب میں رشتہ ازدواج میں منسلک ہوئے تھے، تاہم اب چار سال بعد دونوں نے اپنی زندگی کے نئے سفر کا آغاز الگ الگ کرنے کا فیصلہ کیا ہے۔