غزہ استحکام فورس: مراکش کا فوجی دستہ اسرائیل پہنچ گیا

مراکش کے فوجی افسران غزہ میں قیامِ امن اور سیکیورٹی کی بحالی کے لیے قائم کی جانے والی ‘بین الاقوامی استحکام فورس’ (International Stabilization Force) میں شمولیت کے لیے باضابطہ طور پر اسرائیل پہنچ گئے ہیں۔ عالمی خبر رساں ایجنسی کے مطابق، مراکشی فوج کا یہ اعلیٰ سطحی وفد 18 جون کو جنوبی اسرائیل میں قائم انٹرنیشنل اسٹیبلائزیشن فورس کے مرکزی ہیڈکوارٹر پہنچا، جہاں وہ مشن کی آپریشنل حکمتِ عملی کا حصہ بنیں گے۔

واضح رہے کہ مراکش، غزہ میں امن و امان برقرار رکھنے کے لیے بنائی گئی اس بین الاقوامی فورس میں فعال طور پر شامل ہونے والا پہلا عرب ملک بن گیا ہے۔ مراکشی حکومت نے رواں سال فروری کے مہینے میں غزہ کی پٹی میں امن عامہ کی صورتحال کو کنٹرول کرنے، مقامی نظم و نسق سنبھالنے اور انسانی ہمدردی کی بنیادوں پر امداد کی فراہمی کو محفوظ بنانے کے لیے اپنے پولیس اور فوجی اہلکار تعینات کرنے کا باقاعدہ اعلان کیا تھا، جس کے پہلے مرحلے کا آغاز اب ہو چکا ہے