روس کے یوکرین پر جوابی حملے زیادہ تکلیف دہ اور تباہ کن ہیں، صدر پوتن

روسی صدر ولادیمیر پوتن نے انکشاف کیا ہے کہ روس میں شہری اہداف اور لاجسٹک تنصیبات پر یوکرینی ڈرون و میزائل حملوں کے جواب میں روسی افواج نے یوکرین کے حساس معاشی اور پیداواری مراکز پر اپنے جوابی حملے مزید تیز کر دیے ہیں۔ ایک انٹرویو کے دوران انہوں نے کہا کہ کیف حکومت نے روس کے لاجسٹک راستوں اور شہری علاقوں کو نشانہ بنا کر خود ‘پنڈورا باکس’ کھولا تھا، اور اب اسے روسی جوابی کارروائیوں کا سامنا کرنا پڑ رہا ہے جو کہیں زیادہ تکلیف دہ اور تباہ کن ہیں۔ صدر پوتن نے الزام عائد کیا کہ یوکرین اور اس کے مغربی سرپرستوں نے 40 دن کے اندر روس کو سٹریٹجک شکست دینے اور ملک کو عدم استحکام سے دوچار کرنے کی کوشش کی، مگر وہ ناکام رہے۔ انہوں نے خبردار کیا کہ روسی سرزمین پر ہونے والے کسی بھی حملے کا فوری اور موثر جواب دیا جاتا رہے گا۔