مومنہ اقبال ہراسگی کیس: ثاقب چدھڑ اور اہلیہ کی عبوری ضمانت میں توسیع

سیشن کورٹ لاہور میں معروف اداکارہ مومنہ اقبال کو مبینہ طور پر ہراساں کرنے اور دھمکیاں دینے کے مقدمے میں مسلم لیگ (ن) کے رکن پنجاب اسمبلی (ایم پی اے) ثاقب چدھڑ اور ان کی اہلیہ سمیرا کی عبوری ضمانت پر سماعت ہوئی۔ ایڈیشنل سیشن جج نصرت صدیقی کی عدالت میں تفتیشی افسر نے رپورٹ پیش کرتے ہوئے بتایا کہ ایم پی اے ثاقب چدھڑ کے حد تک تفتیش مکمل ہو چکی ہے اور وہ قصوروار پائے گئے ہیں، جبکہ ان کی اہلیہ نے اپنا موبائل فون این سی سی آئی اے (NCCIA) میں جمع کروا دیا ہے جسے فرانزک تجزیے کے لیے بھجوا دیا گیا ہے۔ مدعیہ کے وکیل نے ملزمان کی ضمانت منسوخ کرنے کی استدعا کی۔ عدالت نے فریقین کو آئندہ سماعت پر حتمی دلائل دینے کی ہدایت کرتے ہوئے دونوں ملزمان کی عبوری ضمانت میں 3 ستمبر 2026 تک توسیع کر دی اور سماعت ملتوی کر دی۔