بھارت میں عیدالاضحیٰ پر نمازعید اور قربانی پر پابندی عائد

بھارت میں مسلمانوں کے بڑے مذہبی تہوار عیدالاضحیٰ (بقرعید) کے موقع پر مودی حکومت اور بی جے پی وزرائے اعلیٰ کے متعصبانہ اور انتہا پسندانہ اقدامات نے نئی دہلی کے نام نہاد سیکولر ریاست ہونے کے دعوؤں کی قلعی کھول دی ہے۔ مسلم اقلیت کو نشانہ بنانے کے لیے ریاستی مشینری کا بے جا استعمال اب کھل کر سامنے آ رہا ہے۔

معروف بھارتی جریدے ‘ٹائمز آف انڈیا’ کی رپورٹ کے مطابق عیدالاضحیٰ کی آمد سے قبل ہی مودی حکومت نے گائے، بچھڑے اور اونٹ کی قربانی پر سخت پابندی عائد کرتے ہوئے شہریوں کو وارننگ جاری کر دی ہے۔ اس مسلم دشمن پالیسی کو آگے بڑھاتے ہوئے اتر پردیش (یو پی) کے جنونی وزیراعلیٰ یوگی آدتیہ ناتھ نے بقرعید کے موقع پر قربانی کرنے اور نمازِ عید ادا کرنے والے مسلمانوں کو کھلی دھمکیاں دی ہیں، جس سے مسلم آبادی میں شدید خوف و ہراس پھیل گیا ہے۔

مودی کے نقشِ قدم پر چلتے ہوئے اتراکھنڈ کے وزیراعلیٰ پشکر سنگھ دھامی نے بھی عیدالاضحیٰ سے قبل ایک متنازع بیان جاری کیا ہے جس میں انہوں نے مسلمانوں کو خبردار کیا ہے کہ سڑکوں اور عوامی مقامات پر کسی بھی قسم کی مذہبی سرگرمی یا نماز برداشت نہیں کی جائے گی۔

دوسری جانب، بھارتی عدلیہ کا جھکاؤ بھی ہندوتوا نظریات کی طرف واضح نظر آ رہا ہے۔ کلکتہ ہائیکورٹ نے مسلمانوں کے جذبات کو مجروح کرتے ہوئے ایک انتہائی متعصبانہ فیصلہ جاری کیا، جس میں عدالت کا کہنا تھا کہ”گائے کی قربانی دینا نہ تو عیدالاضحیٰ کا لازمی حصہ ہے اور نہ ہی اسلام میں اس کا کوئی قطعی مذہبی حکم ہے۔”

دلچسپ بات یہ ہے کہ بی جے پی حکومت کی اس انتہا پسند سوچ نے نہ صرف مسلمانوں کو متاثر کیا ہے بلکہ خود ہندو برادری کے لیے بھی معاشی مشکلات کھڑی کر دی ہیں۔ مغربی بنگال میں بی جے پی کی جانب سے قربانی کے جانوروں کی خرید و فروخت پر پابندی عائد کیے جانے کے بعد مقامی ہندو تاجر سڑکوں پر نکل آئے اور حکومت کے خلاف شدید احتجاج کیا۔ تاجروں کا کہنا ہے کہ اس پابندی سے ان کا کروڑوں روپے کا کاروبار تباہ ہو گیا ہے۔

عالمی مبصرین اور انسانی حقوق کے بین الاقوامی ماہرین نے بھارت کی اس موجودہ صورتحال پر گہری تشویش کا اظہار کیا ہے۔ ماہرین کے مطابق”نریندر مودی اور بی جے پی کی انتہا پسند سوچ نے اقلیتوں، بالخصوص مسلمانوں کے خلاف نفرت کو ریاستی سطح پر فروغ دیا ہے۔ ان اقدامات نے ملک کو شدید اندرونی انتشار اور عدم استحکام کا شکار کر دیا ہے، جس سے بھارت کا نام نہاد سیکولر ازم مکمل طور پر دفن ہو چکا ہے۔”