میر رضا قتل کیس: تحقیقات کیلئے جے آئی ٹی کا اجلاس 7 نومبر کو طلب

کراچی میں ہائی پروفائل میر رضا قتل کیس کی تحقیقات کے لیے تشکیل دی گئی مشترکہ تحقیقاتی ٹیم (JIT) کا پہلا اہم اجلاس طلب کر لیا گیا ہے۔ یہ اجلاس ڈی آئی جی ویسٹ زون عرفان علی بلوچ کی سربراہی میں 7 نومبر (بروز ہفتہ) شام 4 بجے منعقد ہوگا۔

جاری کردہ مراسلے کے مطابق جے آئی ٹی کا یہ اجلاس ڈی آئی جی ویسٹ زون کے دفتر واقع کراچی کے کانفرنس روم میں ہوگا۔ اجلاس میں حساس اداروں کی نمائندگی کرتے ہوئے آئی ایس آئی کے گریڈ 18 یا اس سے زائد رینک کے افسر، انٹیلی جنس بیورو (IB) کراچی، پاکستان رینجرز سندھ اور نیشنل سائبر کرائم انویسٹی گیشن ایجنسی (NCCIA) کے گریڈ 18 کے افسران کو شرکت کی باضابطہ ہدایت کی گئی ہے۔

اس کے علاوہ کیس کے تمام پہلوؤں کا باریک بینی سے جائزہ لینے اور شفافیت کو یقینی بنانے کے لیے مقتول میر رضا کے اہل خانہ کو بھی جے آئی ٹی اجلاس میں طلب کیا گیا ہے تاکہ ان کا مؤقف قلمبند کیا جا سکے اور ان کی جانب سے پیش کردہ شواہد کی جانچ پڑتال کی جا سکے۔ واضح رہے کہ اس جے آئی ٹی کی تشکیل سندھ ہوم ڈیپارٹمنٹ کے خصوصی حکم نامے کی روشنی میں عمل میں لائی گئی ہے۔