مردوں کے ساتھ بہت زیادتی ہوتی ہے ہم نے انہیں مشین بنادیا ہے: متھیرا

پاکستان کی معروف ٹی وی شو میزبان اور ماڈل متھیرا نے معاشرے میں مردوں کو درپیش مسائل اور نفسیاتی دباؤ پر بات کرتے ہوئے کہا ہے کہ ہم نے اپنے مردوں کو محض ایک ’مشین‘ بنا کر رکھ دیا ہے۔

حال ہی میں ایک انٹرویو کے دوران متھیرا نے زندگی کے مختلف پہلوؤں اور بالخصوص مرد و خواتین کے سماجی رویوں پر کھل کر گفتگو کی۔ انہوں نے مردوں کے موقف کی حمایت کرتے ہوئے کہا کہ ہمارے معاشرے میں مردوں کے ساتھ شدید زیادتی ہوتی ہے۔ اگر کوئی عورت کسی مرد پر یہ الزام لگا دے کہ اس نے مجھے ہاتھ کیوں لگایا، تو لوگ سچائی جانے بغیر اور تصدیق کیے بغیر اس مرد پر حملہ آور ہو جاتے ہیں۔

متھیرا کا کہنا تھا کہ “ہم نے اپنے مردوں میں احساس پیدا کرنے کے بجائے ان پر مسلسل ذمہ داریوں کا بوجھ ڈال رکھا ہے۔ ایک مرد ان ذمہ داریوں کو پورا کرتے کرتے اندر سے اتنا ختم ہو جاتا ہے کہ وہ نہ تو ایک اچھا باپ بن پاتا ہے، نہ اچھا بھائی اور نہ ہی اچھا شوہر، اور آخر کار وہ سب کی نظروں میں برا بن جاتا ہے۔”

انہوں نے مزید کہا کہ ہمارے معاشرے میں بے شمار مرد شدید ڈپریشن کا شکار ہیں، لیکن وہ اپنے جذبات اور احساسات کا اظہار کسی کے سامنے نہیں کر سکتے۔ حتیٰ کہ وہ اپنے دوستوں میں بیٹھ کر بھی یہ کہنے سے قاصر ہوتے ہیں کہ آج ان کا دل کتنا دُکھ رہا ہے۔