ایران سے پائیدارجوہری معاہدہ مشکل ہے، حالات حوصلہ افزانہیں، امریکی وزیرخارجہ

امریکی وزیرخارجہ مارک روبیو نے کہاہے کہ ایران کے ساتھ جوہری معاہدے کےلیے کسی حتمی نتیجہ پر پہنچنے کا امکان نہیں ۔

میڈیا رپورٹس کے مطابق امریکی وزیرِ خارجہ نے ہنگری کے دورے پر وزیرِاعظم وکٹر اوربان کے ہمراہ مشترکہ پریس کانفرنس سے خطاب میں کہاکہ ایران کے ساتھ معاملات اس لیے پیچیدہ ہیں کیونکہ وہاں ہم ایسے سخت گیرمذہبی رہنماؤں سے بات کر رہے ہیں جو ملکی فیصلے بین الاقوامی سیاست یا جغرافیائی حقائق کو مدنظر رکھ کر نہیں بلکہ مذہبی عقائد کی بنیاد پر کرتے ہیں۔

مارکو روبیو کا کہنا تھا کہ امریکا سفارتی کاری کے ذریعے ایران کے ساتھ ایسے معاہدے کے لیے تیار ہے جو ہمارے خدشات کو دور کرسکے تاہم اس کے بارے میں غیر ضروری خوش فہمی کا مظاہرہ نہیں کرسکتا۔ ایران کے ساتھ ماضی میں بھی حقیقی اور پائیدار معاہدے کرنا مشکل ثابت ہوا ہے اور اس بار بھی حالات بہت حوصلہ افزا نہیں ہیں۔

امریکا اور ایران کے درمیان مذاکرات کا پہلا دور مسقط میں ہوا جہاں فریقین نے ایک دوسرے سے براہ راست بات چیت تو نہیں کی لیکن علیحدہ علیحدہ عمانی وزیر خارجہ سے ملاقات میں اپنے اپنے تحفظات اور مطالبات پیش کیےتھے۔