میر رضا کیس: ماہرہ خان کا نا انصافی کیخلاف سڑکوں پر نکلنے کا اعلان

عالمی شہرت یافتہ پاکستانی اداکارہ ماہرہ خان نے کراچی کے معروف نوجوان تاجر میر رضا کے بہیمانہ قتل کیس میں ناانصافی کے خلاف آواز اٹھاتے ہوئے مقتول کے وکیل و انسانی حقوق کے رہنما جبران ناصر کی کوششوں کو سراہا اور ناانصافی کے خلاف سڑکوں پر نکلنے کا عزم ظاہر کیا ہے۔

سوشل میڈیا پر گزشتہ چند روز سے وکیل جبران ناصر کے بیانات کے کلپس وائرل ہیں، جن پر تبصرہ کرتے ہوئے ماہرہ خان نے جبران ناصر کو شاباشی دی اور لکھا:

”جبران ناصر آپ بہترین کام کر رہے ہیں، ہم سب اس ناانصافی کے خلاف سڑکوں پر نکلیں گے، یہ سب بکواس اب ختم ہونی چاہیے۔“

دوسری جانب، تاجر میر رضا کے قتل کیس میں سنسنی خیز اور لرزہ خیز انکشافات سامنے آئے ہیں۔ ہفتے کے روز مقتول کی قبر کشائی کے بعد سامنے آنے والی ابتدائی میڈیکل رپورٹ کے مطابق میر رضا کو گولی پیچھے سے ماری گئی تھی اور ان کے جسم پر شدید تشدد کے واضح نشانات موجود تھے۔ ڈاکٹروں کو دائیں ران اور جبڑے پر فریکچر کے شواہد کے علاوہ جسم کے نچلے حصے کے ٹشوز پر خون کے دھبے بھی ملے۔

مزید برآں، کیس کی فارنزک تحقیقات کے دوران یہ روح فرسا انکشاف سامنے آیا ہے کہ فارنزک لیب بھیجی گئی شرٹ اور شواہد کی جانچ سے معلوم ہوا کہ ملزمان نے رضا کے ہاتھ اور چہرے پر تیزاب پھینکا تھا۔ فارنزک ماہرین کے مطابق تیزاب پھینکنے کا بنیادی مقصد مقتول کی شناخت مٹانا تھا تاکہ لاش کی پہچان ممکن نہ ہو سکے۔