اداکارہ مومنہ اقبال کی بہن کیخلاف مقدمہ درج کرنے کے عدالتی احکامات عارضی معطل

لاہور ہائیکورٹ نے معروف اداکارہ مومنہ اقبال کی بہن رمشا اقبال کے خلاف مقدمہ درج کرنے کے جسٹس آف پیس کے احکامات پر عملدرآمد عارضی طور پر روک دیا ہے۔ ہائیکورٹ کے معزز جج جسٹس عبہر گل نے رمشا اقبال کی جانب سے دائر درخواست پر تحریری حکم جاری کرتے ہوئے متعلقہ پولیس اور دیگر فریقین کو نوٹسز جاری کر دیے ہیں اور 14 ستمبر تک تفصیلی جواب طلب کر لیا ہے۔ تحریری حکم نامے کے مطابق، جسٹس آف پیس نے 30 جون کو درخواست گزار رمشا اقبال کے خلاف تھانہ بھوانہ میں مقدمہ درج کرنے کا حکم دیا تھا، جسے انہوں نے ہائیکورٹ میں چیلنج کیا۔ سماعت کے دوران رمشا اقبال کے وکیل عدنان احسان ایڈووکیٹ کے دلائل سننے کے بعد عدالتِ عالیہ نے ماتحت عدالت کے حکم پر سٹے آرڈر جاری کرتے ہوئے مزید کارروائی ملتوی کر دی۔