رجب بٹ سمیت 5 ملزمان پر فردِ جرم عائد کرنے کیلئے 18 اگست کی تاریخ مقرر

سیشن کورٹ لاہور میں معروف یوٹیوبر رجب بٹ اور ان کے دیگر ساتھیوں کے خلاف دائر کردہ استغاثہ کیس کی اہم سماعت ہوئی، جس میں عدالت نے رجب بٹ سمیت تمام 5 نامزد ملزمان پر باقاعدہ فردِ جرم عائد کرنے کے لیے 18 اگست کی تاریخ مقرر کر دی ہے۔

کیس کی سماعت ایڈیشنل سیشن جج ظفر یاب نے کی۔ سماعت کے دوران عائشہ جٹ کی جانب سے دائر کیے گئے استغاثہ کے موقّف پر تفصیلی غور کیا گیا۔ استغاثہ کے وکیل نے عدالت کے سامنے موقّف اختیار کیا کہ پولیس کی جانب سے پیش کیے گئے چالان میں ملزمان سے متعلق تفتیش درست اور قانون کے مطابق انجام نہیں دی گئی۔ استغاثہ نے عدالت سے استدعا کی کہ معاملے کا ازسرِنو اور قانون کے عین مطابق جائزہ لے کر کارروائی کو آگے بڑھایا جائے۔

فاضل جج نے فریقین کے دلائل اور کیس کے تمام تر ریکارڈ کا جائزہ لینے کے بعد پولیس تفتیش پر استغاثہ کے تحافطات کو مدِنظر رکھتے ہوئے رجب بٹ سمیت پانچوں ملزمان کو آئندہ سماعت پر ذاتی حیثیت میں طلب کر لیا، جہاں ان پر باقاعدہ فردِ جرم عائد کی جائے گی۔