لاہور پولیس پاکستان بمقابلہ آسٹریلیا ٹی ٹوئنٹی سیریز کے دوران فول پروف سکیورٹی فراہم کرے گی

لاہور میں پاکستان اور آسٹریلیا کے درمیان ٹی ٹوئنٹی سیریز کے دوران پولیس نے فول پروف سکیورٹی کے اقدامات جاری کر دیے ہیں۔ سی سی پی او لاہور بلال صدیق کمیانہ کے مطابق 9 ایس پیز، 25 ڈی ایس پیز، 73 ایس ایچ اوز، 351 اپر سبارڈنیٹس اور 188 لیڈی کانسٹیبل سمیت 6 ہزار سے زائد افسران و جوان میچز کے دوران سکیورٹی ڈیوٹی پر مامور ہوں گے۔

پاکستان آسٹریلیا ٹی ٹوئنٹی سیریز کے دوران شہر بھر کی سکیورٹی ہائی الرٹ رہے گی اور 1 ہزار سے زائد ٹریفک وارڈنز بھی فرائض سر انجام دیں گے۔ سی سی پی او لاہور نے پولیس افسران کو ہدایت کی ہے کہ وہ پاکستان کرکٹ بورڈ اور متعلقہ اداروں سے مسلسل رابطے میں رہیں اور کرکٹ سٹیڈیم، کھلاڑیوں کی رہائش اور روٹس کی سکیورٹی ایس او پیز پر مکمل عملدرآمد یقینی بنائیں۔

میچز کے دوران سٹیڈیم میں ہر فرد کی تلاشی اور خواتین شرکاء کی چیکنگ بذریعہ لیڈیز پولیس عمل میں لائی جائے گی۔ ٹریفک کی روانی برقرار رکھنے کے لیے موثر اقدامات کیے جائیں گے اور سکیورٹی صورتحال کا جائزہ سیف سٹی اتھارٹی و دیگر کنٹرول رومز کے ذریعے لیا جائے گا۔ ڈولفن فورس، پیرو اور ایلیٹ فورس کی ٹیمیں موثر پٹرولنگ کریں گی جبکہ سینئر پولیس افسران فیلڈ میں موجود رہ کر حالات پر مسلسل نظر رکھیں گے۔

سی سی پی او لاہور نے کہا کہ لاہور پولیس پاکستان آسٹریلیا ٹی ٹوئنٹی سیریز کے جامع سکیورٹی پلان پر عمل پیرا ہے تاکہ ملکی و غیرملکی کھلاڑی اور شائقین محفوظ رہیں۔