لاہور،سی سی ڈی کے مقابلے، 5 ملزمان ہلاک

لاہور شہر میں رات گئے کاؤنٹر کرائم ڈیپارٹمنٹ (CCD) کے پانچ مبینہ پولیس مقابلوں میں زیرِ حراست پانچ ملزمان ہلاک ہو گئے۔ پولیس ذرائع کے مطابق ہلاک ہونے والوں میں رفاقت، شاہد اکرام، زاہد، نادر افضال اور کامران اقبال شامل ہیں۔
پولیس ذرائع کا کہنا ہے کہ تمام ملزمان ماڈل ٹاؤن، ٹاؤن شپ، اقبال ٹاؤن اور صدر ڈویژن کی تحویل میں تھے جنہیں سی سی ڈی اہلکار مبینہ طو ر پر ریکوری کے لیے لے جا رہے تھے۔ اسی دوران ہلاک ملزمان کے ساتھیوں نے زیرِ حراست افراد کو چھڑوانے کے لیے اہلکاروں پر حملہ کیا۔پولیس کے مطابق مبینہ فائرنگ کے تبادلے میں پانچوں ملزمان مارے گئے جبکہ معجزانہ طور پر سی سی ڈی اہلکار محفوظ رہے۔ واقعے کے بعد سی سی ڈی ٹیم نے ہلاک افراد کی لاشیں مردہ خانے منتقل کر دیں۔پولیس ذرائع کے مطابق ہلاک ملزمان منشیات فروشی سمیت متعدد سنگین وارداتوں میں ملوث تھے۔ پولیس نے واقعے کی مزید تحقیقات شروع کر دی ہیں۔