پارلیمانی کمیٹی برائے انتخابی اصلاحات کی تشکیل، اپوزیشن تاحال نام دینے میں ناکام

پارلیمانی کمیٹی برائے انتخابی اصلاحات کی باضابطہ تشکیل کا معاملہ اپوزیشن جماعتوں کی جانب سے تاحال اراکین کے نام نہ دیے جانے کی وجہ سے تاخیر کا شکار ہو گیا ہے۔

حکومتی ذرائع کے مطابق دو ہفتے گزرنے کے باوجود اپوزیشن نے اپنی نمائندگی کے لیے اراکین کے نام پارلیمانی کمیٹی کو فراہم نہیں کیے ہیں۔ دوسری جانب، چیف وہپ ڈاکٹر طارق فضل چوہدری کو حکومتی اتحادی جماعتوں کی جانب سے نام موصول ہو چکے ہیں۔ ان ناموں میں پاکستان پیپلز پارٹی (PPP) کے 7 اراکینِ پارلیمنٹ سمیت استحکام پاکستان پارٹی (IPP)، مسلم لیگ (ق) اور مسلم لیگ (ضیاء) کے نامزد اراکین شامل ہیں۔

ڈاکٹر طارق فضل چوہدری کا کہنا ہے کہ انتخابی اصلاحات کمیٹی میں بلوچستان عوامی پارٹی (BAP)، عوامی نیشنل پارٹی (ANP) اور نیشنل پارٹی کو بھی باقاعدہ نمائندگی دی جائے گی، جبکہ حکمران جماعت پاکستان مسلم لیگ (ن) اپنے نمائندوں کے ناموں کو آئندہ ہفتے حتمی شکل دے گی۔ انہوں نے امید ظاہر کی کہ اپوزیشن کی جانب سے نام موصول ہوتے ہی آئندہ ہفتے پارلیمانی کمیٹی برائے انتخابی اصلاحات کی تشکیل کا عمل مکمل کر لیا جائے گا۔