کمسن بچے کی اپیل پر وزیرِ اعلیٰ خیبر پختونخوا کا لیڈی ریڈنگ اسپتال کا فوری دورہ

وزیرِ اعلیٰ خیبر پختونخوا محمد سُہیل خان آفریدی نے سوشل میڈیا پر ایک کمسن بچے کی تشویشناک حالت سے متعلق شکایت کا فوری نوٹس لیتے ہوئے لیڈی ریڈنگ اسپتال کے ایمرجنسی چلڈرن وارڈ کا ہنگامی دورہ کیا۔

وزیرِ اعلیٰ نے اسپتال پہنچ کر بچے کے اہلِ خانہ سے ملاقات کی اور تمام معاملے کی تفصیلی انکوائری کی۔ متعلقہ ڈاکٹروں نے بریفنگ دیتے ہوئے بتایا کہ بچوں کے آئی سی یو میں بیڈز کی کمی کے باعث مریض کو خیبر ٹیچنگ اسپتال منتقل کرنا ضروری ہے جہاں بیڈ دستیاب ہے۔

وزیرِ اعلیٰ نے فوری طور پر ایمبولینس کی فراہمی اور مریض کی بروقت منتقلی کے احکامات جاری کیے۔ انہوں نے بچوں کے آئی سی یو میں نئے بیڈز کی فراہمی، فوری طور پر فیبری کیٹڈ ایکسٹینشن رومز قائم کرنے اور ہنگامی بنیادوں پر صلاحیت بڑھانے کی ہدایت بھی دی۔

وزیرِ اعلیٰ نے واضح کیا کہ اگر سرکاری اسپتالوں میں بیڈ دستیاب نہ ہوں تو نجی اسپتالوں میں علاج کا بندوبست کیا جائے گا اور تمام اخراجات حکومت برداشت کرے گی۔