خیبر پختونخوا کے اسکولوں میں چھٹی جماعت سے اے آئی کورسز متعارف کرانے کا فیصلہ

وزیر اعلیٰ خیبر پختونخوا محمد سہیل آفریدی نے صوبے کے سرکاری اسکولوں میں چھٹی جماعت سے آرٹیفیشل انٹیلیجنس (AI) کے کورسز متعارف کرانے کا فیصلہ کیا ہے۔
انہوں نے متعلقہ محکموں کو ہدایت دی ہے کہ اس منصوبے کے لیے ضروری اقدامات اور مطلوبہ وسائل ہنگامی بنیادوں پر فراہم کیے جائیں۔

محکمہ ابتدائی و ثانوی تعلیم کے اجلاس کی صدارت کرتے ہوئے وزیراعلیٰ نے کہا کہ مستقبل کی معیشت، تعلیم، صحت اور انتظامی نظام میں مصنوعی ذہانت کا کردار انتہائی اہمیت اختیار کر چکا ہے۔ نوجوانوں کو اے آئی کی تعلیم دینا انہیں مستقبل کے چیلنجز سے نمٹنے کے قابل بنائے گا۔

سہیل آفریدی نے ضم اضلاع کے اسکولوں میں اساتذہ کی کمی پوری کرنے کے لیے نئی آسامیاں تخلیق کرنے، سرکاری امور میں غفلت برتنے والوں کے خلاف کارروائی، اور اساتذہ کی پوسٹنگ، پروموشن، لیو انکیشمنٹ اور اسکالرشپس کو ڈیجیٹل سسٹم پر منتقل کرنے کی ہدایت بھی کی۔
مزید برآں، وزیراعلیٰ نے نصابی کتب کی طباعت سرکاری پریس سے کرانے اور ٹیکسٹ بکس و اسٹیشنری کے ٹینڈرز سے متعلق انکوائری کا حکم دیا۔