کفالت کرنا خواتین کی نہیں بلکہ مردوں کی ذمے داری ہے: کومل عزیز

پاکستانی شوبز انڈسٹری سے وابستہ معروف اداکارہ اور کاروباری شخصیت کومل عزیز خان کے والدین کی مالی کفالت سے متعلق ایک بیان نے سوشل میڈیا پر نئی بحث چھیڑ دی ہے۔ انسٹاگرام پر مداحوں کے ساتھ سوال و جواب کے ایک سیشن کے دوران جب ان سے پوچھا گیا کہ کیا وہ اپنی والدہ کی مالی مدد کرتی ہیں، تو اداکارہ نے جواب دیا کہ وہ ایسا نہیں کرتیں کیونکہ ان کا ماننا ہے کہ گھر چلانا اور کفالت کرنا خواتین کی نہیں بلکہ مردوں کی ذمے داری ہے۔ ‘عشقِ بے نام’ اور ‘رازِ الفت’ جیسے مقبول ڈراموں میں اداکاری کے جوہر دکھانے والی کومل عزیز نے مزید وضاحت کرتے ہوئے کہا کہ وہ اپنے مرحوم والد کی بے حد شکر گزار ہیں جنہوں نے اپنی زندگی ہی میں ان کی والدہ کے لیے اتنے وسائل اور بچت چھوڑ دی تھی کہ انہیں مالی طور پر کبھی اپنی اولاد کا محتاج نہ ہونا پڑا۔ انہوں نے خواتین کے لیے بچت اور سرمایہ کاری کی اہمیت پر بھی زور دیا، جبکہ ان کا یہ بیان اور گزشتہ ڈیڑھ سال سے خاندان کی حمایت کے ساتھ الگ اور خودمختار زندگی گزارنے کا انکشاف سوشل میڈیا پر بحث کا موضوع بنے ہوئے ہیں۔