کوہاٹ پولیس لائنز حملہ: سی ٹی ڈی نے نیٹ ورک کا سراغ لگا لیا

کوہاٹ پولیس لائنز پر ہونے والے دہشت گردانہ حملے سے متعلق کاؤنٹر ٹیررازم ڈیپارٹمنٹ (CTD) کی جوائنٹ انویسٹی گیشن ٹیم نے اہم پیش رفت حاصل کرتے ہوئے حملے میں ملوث نیٹ ورک کا سراغ لگا لیا ہے۔ تفتیشی حکام کے مطابق دو کالعدم دہشت گرد تنظیموں نے مشترکہ طور پر اس حملے کی منصوبہ بندی کی تھی، اور ان کا بنیادی مقصد سی ٹی ڈی کمپاؤنڈ پر حملہ کر کے وہاں زیرِ حراست اپنے خطرناک ساتھیوں کو چھڑانا تھا، جسے سیکیورٹی فورسز نے وقت پر ناکام بنا دیا۔

تحقیقاتی رپورٹ کے مطابق، دہشت گردوں نے حملے سے قبل کوہاٹ میں ایک مکان میں چند روز قیام کیا تھا، جہاں پولیس اور حساس اداروں نے چھاپہ مار کر اہم شواہد اکٹھے کیے اور متعدد سہولت کاروں کو گرفتار کر لیا۔ مزید برآں، موقع پر ہلاک ہونے والے خودکش حملہ آور کی زیرِ استعمال گاڑی کا مکمل ڈیٹا اور دیگر اہم تفصیلات حاصل کر لی گئی ہیں۔ تفتیشی حکام نے انکشاف کیا ہے کہ مذکورہ نیٹ ورک نے گزشتہ برس بھی کوہاٹ پولیس لائنز کو نشانہ بنانے کی کوشش کی تھی، تاہم اس وقت بھی حملہ آوروں کو کارروائی سے قبل ہی گرفتار کر لیا گیا تھا۔