دوستی سے قبل علی رضا سے شدید دشمنی تھی، اداکارہ کنزہ ہاشمی

پاکستانی ڈرامہ انڈسٹری کی مقبول اداکارہ کنزہ ہاشمی نے انکشاف کیا ہے کہ وہ اور اداکار علی رضا اپنی موجودہ گہری دوستی سے قبل ایک دوسرے کے شدید دشمن ہوا کرتے تھے۔ ایک حالیہ انٹرویو کے دوران دونوں اداکاروں نے ماضی کی تلخیوں اور دلچسپ نوک جھوک کے قصے شیئر کیے۔

کنزہ ہاشمی نے بتایا کہ علی رضا سے ان کی پہلی ملاقات ایک اشتہار کی شوٹنگ پر ہوئی تھی جہاں میک اپ روم میں اسپیکر پر اونچی آواز میں گانے بجانے اور ایک دوسرے کو نظر انداز کرنے پر لڑائی کا آغاز ہوا۔ اداکارہ کے مطابق انہوں نے علی رضا کو کافی ‘اوور’ سمجھا، جبکہ ایک ویڈیو ٹرینڈ پہلے اپ لوڈ کرنے کے معاملے پر ان کے درمیان کشیدگی مزید بڑھ گئی تھی۔

دوسری جانب اداکار علی رضا کا کہنا تھا کہ ان کے درمیان دشمنی کی اصل وجہ پروڈکشن ٹیم کی جانب سے پیدا کی گئی غلط فہمیاں تھیں، جو دونوں کو ایک دوسرے کے خلاف باتیں سناتے تھے۔ تاہم، ایئرپورٹ پر ہونے والی ایک اتفاقیہ ملاقات نے حالات بدل دیے۔ دونوں اداکاروں نے بیٹھ کر تمام گلے شکوے دور کیے، جس کے بعد ان کی دشمنی ایک مثالی دوستی میں تبدیل ہو گئی۔