چند برسوں میں 350 کروڑ روپے کا کاروبار، کترینہ کیف بیوٹی انڈسٹری میں بھی کامیاب

بالی ووڈ کی صفِ اول کی اداکارہ کترینہ کیف نے فلمی دنیا کے بعد کاروباری میدان میں بھی کامیابی کے جھنڈے گاڑ دیے ہیں۔ ان کا بیوٹی برانڈ ”کے بیوٹی“ (Kay Beauty) چند ہی برسوں میں بھارت کے نمایاں کاسمیٹک برانڈز میں شامل ہو چکا ہے، جس کی مجموعی فروخت مالی سال 2026 میں تقریباً 350 کروڑ بھارتی روپے تک پہنچ گئی ہے جو کہ گزشتہ سال کے مقابلے میں 46 فیصد زیادہ ہے۔ کترینہ کیف نے یہ برانڈ 2019 میں معروف بیوٹی ریٹیل پلیٹ فارم ‘نائیکا’ (Nykaa) کے اشتراک سے متعارف کرایا تھا۔ مارکیٹنگ ماہرین کے مطابق، اس شاندار کامیابی کی وجہ صرف کترینہ کیف کا نام نہیں بلکہ مصنوعات کا اعلیٰ معیار، مناسب قیمتیں اور جنوبی ایشیا کے موسم کے موافق تیار کی گئی حکمت عملی ہے۔ ‘کے بیوٹی’ اب صرف بھارتی مارکیٹ تک محدود نہیں رہا بلکہ برطانیہ اور مشرقِ وسطیٰ سمیت دیگر بین الاقوامی منڈیوں میں بھی تیزی سے مقبولیت حاصل کر رہا ہے۔