کراچی: مائی کولاچی روڈ قتل کیس کا مرکزی ملزم گرفتار، چار افراد کے قتل کا معمہ حل

کراچی کے علاقے مائی کولاچی روڈ پر پیش آنے والے لرزہ خیز قتل کیس میں پولیس نے بڑی کامیابی حاصل کرتے ہوئے مرکزی ملزم کو گرفتار کر لیا۔ تھانہ ڈاکس پولیس نے بروقت اور پیشہ ورانہ کارروائی کے ذریعے 24 گھنٹوں کے اندر چار افراد کے قتل کا معمہ حل کر لیا۔

ایس ایچ او ڈاکس نند لال کی سربراہی میں کی گئی کارروائی کے دوران ملزم منصور حسین کو گرفتار کیا گیا، جس نے اعترافی ویڈیو بیان میں مقتولہ انیلہ اور اس کے بچوں کے قتل کا اعتراف کر لیا ہے۔

پولیس کے مطابق تفتیش کے دوران قتل کی وجہ بھی سامنے آ گئی ہے۔ ملزم اس وہم میں مبتلا تھا کہ مقتولہ اس پر تعویذ کر رہی ہے۔ پولیس کا کہنا ہے کہ ملزم ذہنی دباؤ کا شکار تھا اور اسی رنجش اور غلط فہمی کے باعث اس نے انتہائی قدم اٹھایا۔

پولیس نے ملزم کے قبضے سے واقعے سے متعلق اہم شواہد بھی برآمد کر کے تحویل میں لے لیے ہیں۔ حکام کے مطابق خفیہ اطلاع پر کی گئی کارروائی کے نتیجے میں اس لرزہ خیز قتل کیس کو ٹریس کیا گیا۔

ملزم کے خلاف مقدمہ درج کر لیا گیا ہے جبکہ مزید قانونی کارروائی جاری ہے۔ پولیس کا کہنا ہے کہ کیس کی مکمل تفتیش کے بعد ملزم کو قانون کے مطابق سخت سزا دلوانے کی کوشش کی جائے گی۔