کراچی: سہراب گوٹھ گنامنڈی کے قریب گھر سے چار افراد کی لاشیں برآمد، وزیر داخلہ سندھ کا نوٹس

سہراب گوٹھ گنامنڈی کے قریب ایک گھر سے چار افراد کی لاشیں برآمد ہونے کے افسوسناک واقعے نے علاقے میں خوف و ہراس پھیلا دیا۔ جاں بحق افراد میں تین بچے اور ایک خاتون شامل ہیں، جن کی لاشیں گھر کے اندر پھندے سے لٹکی ہوئی حالت میں پائی گئیں۔

واقعے کی اطلاع ملتے ہی پولیس اور ریسکیو ٹیمیں موقع پر پہنچ گئیں اور لاشوں کو ضابطے کی کارروائی کے لیے اسپتال منتقل کر دیا گیا۔ ابتدائی طور پر واقعے کی وجوہات کا تعین نہیں ہو سکا تاہم پولیس مختلف پہلوؤں سے تفتیش کر رہی ہے۔

وزیر داخلہ سندھ ضیاء الحسن لنجار نے واقعے کا سختی سے نوٹس لیتے ہوئے ایس ایس پی ایسٹ سے فوری تفصیلات طلب کر لی ہیں۔ انہوں نے ہدایت کی ہے کہ قتل کے پس پردہ عوامل اور محرکات کا مکمل طور پر جائزہ لے کر واقعے میں ملوث ملزمان کو قانون کی گرفت میں لایا جائے۔

وزیر داخلہ سندھ نے مزید کہا کہ واقعے میں ملوث عناصر کی جلد از جلد شناخت اور گرفتاری کو یقینی بنایا جائے اور متاثرہ خاندان کو انصاف کی فراہمی کے لیے شفاف تحقیقات کی جائیں گی۔

حکام کے مطابق واقعے کی ہر پہلو سے تحقیقات جاری ہیں جبکہ مزید پیش رفت تفتیش مکمل ہونے کے بعد سامنے آئے گی۔