جوناگڑھ آج بھی پاکستان کا حصہ ہے، نواب علی مرتضیٰ خانجی کا لاہور ہائیکورٹ بار میں خطاب

لاہور ہائیکورٹ بار ایسوسی ایشن میں “جوناگڑھ کا مسئلہ: قائداعظم کا ادھورا خواب” کے موضوع پر سیمینار منعقد ہوا جس کے مہمانِ خصوصی نواب آف جوناگڑھ نواب علی مرتضیٰ خانجی تھے۔ تقریب سے خطاب کرتے ہوئے انہوں نے کہا کہ جوناگڑھ کل بھی پاکستان تھا، آج بھی پاکستان ہے اور ہمیشہ پاکستان کا حصہ رہے گا۔

نواب علی مرتضیٰ خانجی نے بتایا کہ تقسیمِ ہند کے وقت نواب مہابت خانجی نے رعایا کی مرضی، باہمی مشاورت اور قائم شدہ کونسل کی سفارشات کی بنیاد پر پاکستان سے الحاق کا فیصلہ کیا۔ ان کے مطابق یہ فیصلہ مکمل امن کے ماحول میں ہوا اور دو ماہ تک جوناگڑھ میں پاکستان کا پرچم سربلند رہا۔

انٹرنیشنل وکیل آصف تنویر اعوان نے اپنے خطاب میں کہا کہ جوناگڑھ کا پاکستان سے الحاق ایک بین الاقوامی معاہدہ ہے جو آج بھی قانونی طور پر برقرار ہے جبکہ بھارت کا قبضہ غیرقانونی ہے۔ انہوں نے بتایا کہ بھارت کی جانب سے معاشی ناکہ بندی، بندرگاہوں کی بندش اور اشتعال انگیزی نے ریاست میں بحران پیدا کیا، جو بعد ازاں بھارتی مداخلت کا جواز بنایا گیا۔

مقررین کے مطابق، تاریخی دستاویزات سے ثابت ہے کہ بھارتی قیادت نے نواب کو فیصلہ تبدیل کرنے کے لیے دباؤ ڈالا جو بین الاقوامی قانون اور 1947ء کے اصولوں کے خلاف تھا۔

نواب علی مرتضیٰ خانجی نے کہا کہ جوناگڑھ کے تاریخی و قانونی پہلوؤں پر تحقیق ضروری ہے تاکہ بھارتی پروپیگنڈے کا مؤثر جواب دیا جا سکے۔ انہوں نے اپنی حیثیت کو “Sovereign in Exile” یعنی جلاوطن حکمران قرار دیا جو آج بھی بین الاقوامی قانون کے مطابق قائم ہے۔

تقریب میں لاہور ہائیکورٹ بار کی قیادت سمیت متعدد وکلاء نے شرکت کی اور نواب آف جوناگڑھ کی حمایت کا اعلان بھی کیا۔