صدر ٹرمپ نے یرغمالیوں کی واپسی کیساتھ اہل غزہ کی بھی مدد کی کوشش کی: جیرڈ کشنر

واشنگٹن: امریکی صدر ڈونلڈ ٹرمپ کے داماد جیرڈ کشنر نے کہا ہے کہ صدر ٹرمپ نے اسرائیلی یرغمالیوں کی واپسی کے ساتھ ساتھ اہل غزہ کی تکالیف دور کرنے اور ان کی مدد کے لیے سنجیدہ کوششیں شروع کر دی ہیں۔ واشنگٹن میں نو تشکیل شدہ “پیس کونسل” کے پہلے اجلاس سے خطاب کرتے ہوئے جیرڈ کشنر نے غزہ کی جنگ کو ہر لحاظ سے “المناک” قرار دیا۔

جیرڈ کشنر نے انکشاف کیا کہ وہ غزہ مینجمنٹ کی نیشنل کمیٹی کے چیئرمین علی شعث اور دیگر متعلقہ کمیٹیوں کے ساتھ مل کر کام کر رہے ہیں تاکہ اہل غزہ کو مکمل تعاون فراہم کیا جا سکے۔ انہوں نے کہا کہ ہمارا مقصد ایک ایسی شراکت داری قائم کرنا ہے جس میں فلسطینیوں اور اسرائیلیوں کے لیے امن، استحکام اور باوقار زندگی کے مواقع موجود ہوں۔

انہوں نے ان ممالک کا شکریہ ادا کیا جنہوں نے پیس کونسل میں شمولیت اختیار کی اور وسائل فراہم کرنے کا عزم ظاہر کیا۔ کشنر کا کہنا تھا کہ ہمیں وسائل کی کمی کا سامنا نہیں ہے، بلکہ اصل چیلنج “بہترین عمل درآمد” (Best Implementation) کا ہے تاکہ ایک ایسا مستقبل بنایا جا سکے جو ماضی کے چیلنجز سے مختلف ہو۔ انہوں نے واضح کیا کہ اس مشن میں “ناکامی کوئی آپشن نہیں” اور ہمیں ہر صورت کامیابی کے راستے تلاش کرنے ہوں گے