نوشکی میں سکیورٹی فورسز کی کارروائی، 11 دہشتگرد جہنم واصل

بلوچستان کے ضلع نوشکی میں انٹیلی جنس بنیادوں پر کیے گئے ایک کامیاب آپریشن کے دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا، جس کے نتیجے میں شدید فائرنگ کے تبادلے کے بعد 11 دہشت گرد ہلاک ہو گئے۔ پاک فوج کے شعبہ تعلقات عامہ (آئی ایس پی آر) کے مطابق، بلوچستان میں 21 ستمبر سے جاری بھارتی حمایت یافتہ عناصر اور فتنہ الخوارج کے خلاف وسیع پیمانے پر آپریشنز کے دوران مجموعی طور پر 33 دہشت گردوں کو جہنم واصل کیا جا چکا ہے۔

آئی ایس پی آر نے بتایا کہ 24 ستمبر کو ‘آپریشن شعبان’ کے تسلسل میں کی گئی کارروائی میں 5 دہشت گرد مارے گئے تھے، جس سے صرف شعبان سیکٹر میں ہلاک ہونے والے دہشت گردوں کی تعداد 22 ہو گئی تھی۔ فورسز نے دہشت گردوں کے ٹھکانوں سے بھاری مقدار میں اسلحہ، گولہ بارود اور دھماکا خیز مواد بھی برآمد کر لیا ہے۔ ترجمان پاک فوج کا کہنا ہے کہ وفاقی ایپکس کمیٹی کے منظور کردہ وژن ‘عزمِ استحکام’ کے تحت ملک سے غیر ملکی سرپرستی میں ہونے والی دہشت گردی کے مکمل خاتمے تک یہ کلیئرنس اور انسدادِ دہشت گردی کارروائیاں بلا تعطل جاری رہیں گی۔