ایران ظلم، دباؤ یا دھمکیوں کے سامنے ہرگز نہیں جھکے گا: باقر قالیباف

ایرانی پارلیمنٹ کے اسپیکر محمد باقر قالیباف نے واضح کیا ہے کہ ایران نے کبھی بھی جنگ کی خواہش نہیں رکھی، تاہم وہ ظلم، دباؤ یا کسی بھی قسم کی دھمکیوں کے سامنے ہرگز نہیں جھکے گا۔ انہوں نے انکشاف کیا کہ مذاکرات کے دوران امریکی نائب صدر کو واضح طور پر بتا دیا گیا تھا کہ ایران کو امریکہ پر بالکل اعتماد نہیں ہے۔ ایرانی اسپیکر کا کہنا تھا کہ دنیا کو یہ حقیقت سمجھ لینی چاہیے کہ ایران کے ہتھیار ڈالنے یا سرِ تسلیم خم کرنے سے تنازعات ختم نہیں ہوں گے، اور اگر امریکہ نے کسی بھی معاہدے کی خلاف ورزی کی تو ایران اپنے مکمل دفاع کے لیے ہمہ وقت تیار ہے۔ باقر قالیباف نے زور دے کر کہا کہ امریکہ کے ساتھ مؤثر مذاکرات صرف وہی فریق کر سکتا ہے جو اپنی دفاعی صلاحیت اور جنگ کی بھرپور تیاری رکھتا ہو۔ ان کا مزید کہنا تھا کہ دنیا کے بیشتر ممالک جنگ کے خاتمے اور سفارتی حل کو ہی ترجیح دیتے ہیں لیکن پائیدار امن ہمیشہ باہمی احترام اور وعدوں کی پاسداری سے ہی ممکن ہے۔