امریکا سے مذاکرات میں اچھی پیش رفت ہوئی، آئندہ دور اگلے ہفتے ہوگا: ایران

ایران اور امریکا کے درمیان عمان کی ثالثی میں ہونے والے مذاکرات میں اہم پیش رفت سامنے آئی ہے۔ سوئٹزرلینڈ میں ہونے والی اس ملاقات کے بعد ایرانی وزیرِ خارجہ عباس عراقچی نے تصدیق کی ہے کہ فریقین جوہری اقدامات اور پابندیوں کے خاتمے جیسے حساس نکات پر سنجیدگی سے داخل ہو چکے ہیں۔ امریکی صدر ڈونلڈ ٹرمپ کی جانب سے دی گئی 15 روزہ مہلت کے سائے میں ہونے والے ان مذاکرات کو اب تک کے “شدید ترین اور سنجیدہ” مذاکرات قرار دیا جا رہا ہے۔ اب دونوں ممالک کے وفود پیر کے روز سے آسٹریا کے دارالحکومت ویانا میں تکنیکی بات چیت کا آغاز کریں گے۔