امریکا اسرائیل کو فرسٹ قرار دینے کی پالیسی کے باعث تباہی کے دہانے پر ہے: باقر قالیباف

ایرانی پارلیمنٹ (مجلس) کے سپیکر محمد باقر قالیباف نے امریکی قیادت اور نائب صدر جے ڈی وینس کو شدید تنقید کا نشانہ بناتے ہوئے کہا ہے کہ امریکہ اپنی ‘اسرائیل فرسٹ’ پالیسی کے باعث تباہی کے دہانے پر پہنچ چکا ہے۔

سماجی رابطے کی ویب سائٹ ایکس (X) پر جاری اپنے ایک بیان میں ایرانی سپیکر نے امریکی نائب صدر جے ڈی وینس کی جانب سے امریکی وسطی مدتی انتخابات میں شکست کی وجہ ایران جنگ کو قرار دینے کے بیان کا جواب دیتے ہوئے کہا کہ امریکی قیادت کی حالت اس ہارنے والے جواری جیسی ہے جو بازی ہارنے کے باوجود میز چھوڑنے کو تیار نہیں ہوتا۔ انہوں نے کہا کہ ایک طرف جے ڈی وینس لمبے لیکچرز دے رہے ہیں جبکہ دوسری جانب ان کے باس، امریکی صدر ڈونلڈ ٹرمپ، ایران کے خلاف جنگ کے اگلے مرحلے کی تیاریوں میں مصروف ہیں۔

باقر قالیباف نے امریکی نائب صدر پر طنز کرتے ہوئے کہا کہ جے ڈی وینس کو چاہیے کہ وہ طویل لیکچرز دینے کے بجائے ایران جنگ پر اپنا موقف براہِ راست اپنے باس (ڈونلڈ ٹرمپ) کے سامنے رکھیں۔ انہوں نے مزید کہا کہ امریکی انتظامیہ کی جانب سے مسلسل اسرائیل کو ترجیح دینے کی غلط حکمتِ عملی نے خود امریکہ کو سیاسی اور عالمی سطح پر ایک بڑی دلدل میں دھکیل دیا ہے۔