سپریم لیڈر کو قتل کرنے کی اسرائیلی دھمکی ریاستی دہشت گردی ہے: ایران

اقوامِ متحدہ میں ایران کے مستقل مندوب امیر سعید ایروانی نے اسرائیل کی جانب سے ایران کے نو منتخب سپریم لیڈر آیت اللہ مجتبیٰ خامنہ ای کو قتل کرنے کی حالیہ دھمکی کے خلاف اقوامِ متحدہ میں باضابطہ اور شدید احتجاج درج کرایا ہے۔

اقوامِ متحدہ کے سیکریٹری جنرل انتونیو گوتریس، سلامتی کونسل اور جنرل اسمبلی کے صدور کو لکھے گئے ایک مکتوب میں ایرانی سفیر نے مؤقف اختیار کیا کہ اسرائیلی وزیرِ دفاع اسرائیل کاٹز کی یہ حالیہ دھمکی ایرانی حکومتی اور مذہبی عہدیداروں کو نشانہ بنانے کی ایک سوچی سمجھی اور منظم ریاستی دہشت گردی کی پالیسی کا حصہ ہے۔ انہوں نے اس خطرناک دھمکی کو ایران کے خلاف اسرائیلی حکومت کی ان غیر قانونی جارحانہ کارروائیوں کا تسلسل قرار دیا، جن میں حال ہی میں مرحوم ایرانی رہنما آیت اللہ سید علی خامنہ ای اور دیگر اعلیٰ عسکری و سیاسی حکام کی ٹارگٹ کلنگ شامل ہے، جو امریکہ کی براہِ راست شرکت، رابطہ کاری اور حمایت سے انجام دی گئیں۔

ایرانی سفیر امیر سعید ایروانی نے سلامتی کونسل کے کردار پر سخت تنقید کرتے ہوئے کہا کہ بدقسمتی سے سلامتی کونسل کی جانب سے اقوامِ متحدہ کے منشور کے تحت اپنی ذمہ داریاں پوری نہ کرنے سے اسرائیل کے لیے ‘سزا سے استثنا’ کا ماحول مضبوط ہوا ہے۔ کونسل کی اسی خاموشی کے نتیجے میں اسرائیلی حکومت ریاستی دہشت گردی کو معمول بنانے میں مزید دلیر ہو گئی ہے، جو کہ عالمی امن و سلامتی کے لیے ایک نہایت خطرناک نظیر ہے۔ انہوں نے عالمی برادری کو واضح طور پر خبردار کیا کہ تہران اپنے خلاف ہونے والے کسی بھی دشمنانہ اقدام کا بھرپور جواب دینے کا حق محفوظ رکھتا ہے