ہم پر جنگ بندی کے خطرات منڈلا رہے جنہیں سنجیدگی سے لے رہے ہیں: سربراہ ایرانی ایٹمی تنظیم

سربراہ ایرانی ایٹمی تنظیم محمد اسلامی نے کہا ہے کہ ایران کو جنگ بندی سے متعلق ممکنہ خطرات کا سامنا ہے جنہیں سنجیدگی سے لیا جا رہا ہے، تاہم دفاعی مقاصد کے لیے ایٹمی ہتھیاروں کی ضرورت نہیں۔

عالمی میڈیا کے مطابق محمد اسلامی کا کہنا تھا کہ ایران اپنے دفاع کے لیے درکار تمام صلاحیتیں رکھتا ہے اور ایٹمی ہتھیار اس کی حکمتِ عملی کا حصہ نہیں۔

یہ بیان ایسے وقت میں سامنے آیا ہے جب امریکا نے مشرقِ وسطیٰ میں اپنی فوجی موجودگی بڑھا دی ہے۔ امریکی صدر ڈونلڈ ٹرمپ کی جانب سے ایران کو فوجی کارروائی کی دھمکی کے بعد طیارہ بردار بحری جہاز یو ایس ایس ابراہام لنکن کی قیادت میں امریکی بحری بیڑا خطے میں تعینات کر دیا گیا ہے۔

امریکی صدر کا کہنا ہے کہ ایران فوجی تصادم سے بچنے کے لیے معاہدہ کرنا چاہتا ہے، جبکہ تہران کو امریکی تجاویز پر جواب دینے کے لیے غیر اعلانیہ ڈیڈ لائن بھی دی گئی ہے۔ ایرانی صدر اس سے قبل مذاکرات کا خیرمقدم کرتے ہوئے واضح کر چکے ہیں کہ ایران جنگ نہیں چاہتا۔