انسٹاگرام ریلز کیمرا میں جدید ایڈیٹنگ فیچرز متعارف

انسٹاگرام نے اپنے ریلز کیمرا میں نمایاں اور جدید اپ گریڈز متعارف کرا دیے ہیں، جن کا مقصد صارفین کو بہتر، تیز اور تخلیقی ویڈیو ایڈیٹنگ سہولت فراہم کرنا ہے۔ نئے اپ ڈیٹ کے بعد صارفین اب ریلز کیمرا کے ذریعے 20 منٹ تک ویڈیو ریکارڈ کر سکیں گے، جو پہلے کے مقابلے میں ایک بڑا اضافہ ہے۔

کمپنی کے مطابق یہ تبدیلیاں صارفین کی فیڈبیک کی بنیاد پر کی گئی ہیں، جن میں “ٹچ اپ موڈ” کی شدت کنٹرول کرنے والا سلائیڈر، بہتر گرین اسکرین فنکشن، اور ریکارڈنگ کے دوران نیا کاؤنٹ ڈاؤن اور ٹائمنگ کنٹرول شامل ہیں۔

انسٹاگرام نے ایڈیٹنگ کے عمل کو مزید آسان بنانے کے لیے “انڈو آپشن” بھی شامل کیا ہے، جس کے ذریعے صارفین ریلز کے سیکوئنس میں آخری کلپ کو بآسانی واپس لے سکتے ہیں۔ اگرچہ نیا کیمرا 20 منٹ تک کی ریکارڈنگ کی اجازت دیتا ہے، تاہم انسٹاگرام کا الگورتھم بدستور 3 منٹ سے کم دورانیے کی ریلس کو زیادہ ترجیح دیتا ہے۔

ماہرین کے مطابق یہ اپ گریڈ تخلیق کاروں کو تفصیلی ویڈیوز، ٹیوٹوریلز اور سیریز نما مواد بنانے کا نیا موقع فراہم کرے گا، جبکہ پلیٹ فارم اپنی توجہ چھوٹے مگر زیادہ مؤثر مواد پر برقرار رکھے ہوئے ہے۔