ملک میں سیاسی اتفاقِ رائے کے لیے قیدی لیڈر سے بات چیت ضروری: فواد چوہدری و عمران اسماعیل

اسلام آباد ہائی کورٹ کے باہر میڈیا سے گفتگو کرتے ہوئے سابق وفاقی وزراء عمران اسماعیل اور فواد چوہدری نے بتایا کہ انہوں نے جیل رولز کے تحت بانی پی ٹی آئی اور بشریٰ بی بی سے ملاقات کے لیے قانونی درخواست دائر کی ہے۔ عمران اسماعیل کا کہنا تھا کہ وہ ملاقات کے دوران بانی پی ٹی آئی کی صحت کی معلومات حاصل کرنے کے علاوہ نئے صوبوں کے قیام سے متعلق اہم امور پر بھی بات کریں گے۔ اس موقع پر فواد چوہدری نے کہا کہ مسلم لیگ (ن) اور پیپلز پارٹی کے ہوتے ہوئے ملک آگے نہیں بڑھ سکتا اور وزیراعظم شہباز شریف اب تک مرکز اور صوبوں میں مجموعی طور پر 17 بجٹ پیش کر چکے ہیں مگر حالات میں کوئی بہتری نہیں آئی۔ انہوں نے اختیارات کی منتقلی کی حمایت کرتے ہوئے کہا کہ ملک کے سب سے بڑے سیاسی رہنما اس وقت جیل میں قید ہیں اور حقیقی سیاسی اتفاقِ رائے کے لیے بانی پی ٹی آئی اور قید دیگر سیاسی کارکنان کی رہائی اور ان سے مذاکرات ضروری ہیں۔ فواد چوہدری نے ملکی اسٹیبلشمنٹ سے بھی صورتحال پر نظرِ ثانی اور گفتگو کی اپیل کی۔