14 اگست کو احتجاج کرنے والے ہم میں سے نہیں: اختیار ولی پی ٹی آئی پر برس پڑے

مسلم لیگ (ن) کے رہنما اختیار ولی خان نے پشاور میں میڈیا سے گفتگو کرتے ہوئے پاکستان تحریک انصاف (پی ٹی آئی) کو شدید تنقید کا نشانہ بنایا۔ انہوں نے کہا کہ 14 اگست جیسے قومی دن پر احتجاج کرنے والے ملکی نظریے اور قومی تشخص کے خلاف کام کر رہے ہیں۔ اختیار ولی نے الزام عائد کیا کہ پی ٹی آئی کارکنوں نے جناح ہاؤس اور ریڈیو پاکستان کو نقصان پہنچایا اور شہدا کی قربانیوں کا احترام نہیں کیا۔ خیبر پختونخوا حکومت پر تنقید کرتے ہوئے ان کا کہنا تھا کہ صوبے میں تعلیمی ادارے تباہ ہو چکے ہیں جبکہ منشیات اور جنگلات کی کٹائی میں ملوث افراد کو وزیر بنایا گیا ہے۔ رہنما مسلم لیگ (ن) نے مزید کہا کہ ہم نے ملک کو ڈیفالٹ سے بچایا جبکہ پی ٹی آئی کی پالیسیاں ملک کو نقصان پہنچانے پر مبنی رہیں۔