کوئی سرکاری افسر اسلام آباد مارچ کے شرکا کی مدد نہیں کرے گا، آئی جی خیبرپختونخوا

انسپکٹر جنرل (آئی جی) پولیس خیبر پختونخوا نے اسلام آباد ہائی کورٹ کے حکم کی روشنی میں صوبے کے تمام پولیس افسران و محکموں کے لیے باضابطہ مراسلہ جاری کرتے ہوئے سخت ہدایات جاری کی ہیں۔ مراسلے کے مطابق کوئی بھی سرکاری افسر یا اہلکار اسلام آباد کی جانب جانے والے کسی بھی مارچ، ریلی یا جلوس کے شرکاء کو کسی بھی نوعیت کی معاونت یا سہولت فراہم نہیں کرے گا۔ آئی جی کے پی نے واضح کیا کہ اگر کسی بھی سرکاری افسر کو اس سلسلے میں مدد فراہم کرنے پر مجبور کیا جائے تو وہ فوراً متعلقہ اعلیٰ حکام کو مطلع کرے۔

آئی جی خیبر پختونخوا کے مراسلے میں مزید ہدایت کی گئی ہے کہ افسران کسی ایسے شخص کو ریلی یا مارچ میں شرکت کی اجازت نہ دیں جس کا مقصد وفاقی دارالحکومت میں شہریوں کی آزادانہ نقل و حرکت، تجارت، تعلیمی سرگرمیوں یا طبی سہولیات کی فراہمی میں رکاوٹیں پیدا کرنا ہو۔ پولیس و دیگر محکموں کو سخت احکامات جاری کیے گئے ہیں کہ سرکاری گاڑیوں اور مشینری کو کسی صورت بھی مارچ میں شرکت کرنے والوں کی سہولت کے لیے استعمال نہ کیا جائے اور نہ ہی کسی ملازم کو زبردستی ریلیوں یا احتجاج کا حصہ بنایا جائے۔