آئی سی سی نے بنگلادیشی صحافیوں کو ٹی 20 ورلڈکپ کی کوریج سے روک دیا

انٹرنیشنل کرکٹ کونسل (آئی سی سی) نے ٹی ٹوئنٹی ورلڈکپ کی کوریج کے لیے بنگلا دیشی صحافیوں کو ایکریڈیشن دینے سے انکار کر دیا ہے۔ بنگلا دیشی میڈیا کے مطابق سری لنکا اور بھارت میں کسی بنگلا دیشی صحافی کو ایکریڈیشن جاری نہیں کی گئی، جبکہ کچھ صحافیوں کی ایکریڈیشن پہلے ہو چکی تھی مگر بعد میں کینسل کر دی گئی۔

بنگلا دیشی صحافیوں نے بتایا کہ بعض صحافیوں کو پہلے تصدیقی ای میل موصول ہوئی، لیکن بعد میں انہیں ایکریڈیشن مسترد کرنے کی اطلاع دی گئی۔ بنگلا دیش کے اسپورٹس صحافیوں کی تنظیموں نے کہا ہے کہ آئی سی سی کی جانب سے کوئی وضاحت نہیں دی گئی اور جلد آئندہ کے لائحہ عمل کا اعلان کیا جائے گا۔

بنگلا دیش کرکٹ بورڈ کے میڈیا کمیٹی کے چیئرمین امزاد حسین نے تصدیق کی کہ بنگلا دیش کے 130 سے 150 صحافیوں کی درخواستیں مسترد کر دی گئی ہیں۔ آئی سی سی کی جانب سے ابھی تک بنگلا دیشی صحافیوں کو ایکریڈیشن نہ دینے پر کوئی باضابطہ وضاحت سامنے نہیں آئی۔