پنجاب میں 80 لاکھ بچیاں سکول نہیں جا رہیں: حافظ نعیم الرحمان کا دعویٰ

امیر جماعت اسلامی حافظ نعیم الرحمان نے لاہور میں دھرنے کے شرکاء سے خطاب کرتے ہوئے پنجاب حکومت کی تعلیمی و معاشی پالیسیوں کو شدید تنقید کا نشانہ بنایا ہے۔ انہوں نے انکشاف کیا کہ صوبے میں تقریباً 80 لاکھ بچیاں اسکول جانے سے محروم ہیں، جبکہ حکومت نے ہزاروں اسکولوں کو آؤٹ سورس کر کے بنیادی تعلیم کا حق بھی چھین لیا ہے۔ انہوں نے کہا کہ صوبے کی شرح خواندگی بمشکل 70 فیصد ہے اور خواتین و مردوں کی ایک بڑی تعداد بنیادی تعلیمی حقوق سے محروم رکھی گئی ہے۔

حافظ نعیم الرحمان نے صحت اور روزگار کے شعبوں پر بات کرتے ہوئے کہا کہ ڈاکٹر بننے والی طالبات کو ہاؤس جاب میں پورا حق نہیں مل رہا اور بنیادی مراکز صحت سے ذمہ داری ختم کی جا رہی ہے۔ انہوں نے بتایا کہ ملک کے 8.5 کروڑ مزدوروں میں 3 کروڑ خواتین شامل ہیں، لیکن پنجاب کی 4 کروڑ خواتین کے لیے کم از کم اجرت تک طے نہیں کی گئی۔ ان کا کہنا تھا کہ گزشتہ چھ برسوں میں پنجاب میں غربت میں 41 فیصد اضافہ ہوا ہے اور 40 فیصد سے زائد لوگ غربت کی لکیر سے نیچے زندگی گزارنے پر مجبور ہیں۔